तुमच्या बँक खात्यातून जर कुणी लबाडीने पैसे काढले असतील, तर तुमच्या बँकेला तात्काळ कळवा. तुम्ही जेव्हा बँकेला कळवता तेव्हा तुमच्या बँकेकडून आठवणीने पोचपावती घ्या. तुमची तक्रार पोचल्यापासून 90 दिवसांच्या आत बँकेने तिचे निवारण करणे गरजेचे आहे.

हा व्यवहार जर तुमच्या निष्काळजीपणामुळे, म्हणजेच तुमचा पासवर्ड, पिन, ओटीपी वगैरे शेअर केल्यामुळे झालेला असेल तर तुमच्या बँकेला कळवेपर्यंत तुम्हाला हे होणारे नुकसान सहन करावे लागते. तुम्ही बँकेला कळवल्यानंतर फसवणुकीचे व्यवहार सुरूच राहिले तर बँकेला तुम्हाला त्या रकमांची भरपाई द्यावी लागेल. तुम्ही जर कळवायला विलंब केलात ,तर तुमचे नुकसान वाढेल आणि ते आरबीआयची मार्गदर्शनप्रणाली आणि बँकेच्या बोर्डाने स्वीकारलेले धोरण ह्यावरून ठरवले जाईल.